意大利射手王逝世　一項紀錄50年無人能破

意大利殿堂級射手利華因為心臟病逝世，終年79歲，呢位傳奇前鋒球員生涯曾經為意大利國家隊上陣42場射入35球，屬於「藍衣兵團」史上最多入波嘅國腳，經過50年之後，仍然未有人可以超越佢。

利華職業生涯絕大部份時間效力卡利亞里，為呢支意甲球隊上陣374次，射入205球，並協助球隊奪得1969/70年球季意甲冠軍。利華嘅國際賽生涯亦非常輝煌，屬於意大利奪得1968年歐國盃冠軍嘅功臣，以及協助意軍打入1970年世界盃決賽，可惜不敵巴西。

利華由1965至1974年合共9年國際賽涯，為意大利射入35球，經過半世紀都冇意大利國腳可以打破佢嘅入球紀錄。利華退役之後，曾於1988至2013年期間，擔任意大利國家隊管理人員，意軍捧2006年世界盃冠軍，佢亦係團隊成員。