阿仙奴同富安健洋賓韋特續約

阿仙奴打入歐聯8強後又有好消息，近日接連同兩位後防主力富安健洋及賓韋特完成續約，最快於周六確認。

多間傳媒報道，阿仙奴同賓韋特達成續約協議，尚餘2年合約嘅賓韋特再續新約，年期至2028年，另加延長1年，約滿時賓韋特將滿30歲。

至於25歲嘅富安健洋將於來季約滿，據報雙方於上月達成續約協議，傳媒報道新約同樣到2028年，而且仲會大幅加薪。

富安健洋同賓韋特同樣係右閘，前者今季交出1球3助攻，賓韋特貢獻2球4助攻，未來幾年都係隊中重要球員。