拜仁「Plan B」搵施丹執教　列貝利做副手

隨住沙比阿朗素留效利華古遜，一直力斟佢加盟嘅拜仁慕尼黑急謀對策，另覓新帥接替今夏離隊嘅杜曹，根據德國《圖片報》爆料，拜仁頭號目標係聘請前皇馬主帥施丹接手領軍，同時搵名宿列貝利回巢擔任助教，打造「法式足球」，力爭下季捲土重來。

拜仁慕尼黑落後榜首利華古遜10分，衞冕聯賽錦標機會渺茫，會方認為必須聘請具級數名帥改革球隊，施丹曾以教練身份率領皇馬捧2次西甲冠軍，以及連奪3屆歐聯冠軍等多項錦標，非常符合會方要求，加上呢位51歲法國名帥3年前離隊皇馬後，一直冇教職在身，說服佢加盟成功機會較大。施丹早前亦表示即將復出教波，以拜仁嘅級數，相信應該符合心水，雙方有望一拍即立。

此外，拜仁亦有意搵列貝利回巢出任助教，呢位40歲翼鋒球員時代曾效力拜仁12年，其後去意甲搵食，2年前已掛靴，佢非常熟悉拜仁運作及文化，加上同施丹曾經係法國國家隊隊友，大家同聲同氣，有利協助施丹盡快了解球隊。