拉莫斯38歲生日入波　幫西維爾搶到救命3分

當39歲C朗喺沙特聯賽又上演「帽子戲法」嘅時候，佢前皇馬隊友沙治奧拉莫斯亦不遑多讓，喺周六(30日)晚西甲，射入全場唯一入波，協助西維爾作客以1比0擊敗基達菲，搶到護級救命3分。比賽當日係沙治奧拉莫斯38歲牛一，今場勝仗絕對係最佳生日禮物。

賽前西維爾只係領先尾三卡迪斯3分，仍深受降班威脅，所以搶分決心非常強，開賽5分鐘，沙治奧拉莫斯接應角球，近門射入打開紀錄。呢位西班牙中堅今季由巴黎聖日耳門重投母會西維爾，各項賽事上陣29場入7球，證明「帶刀侍衞」仍未生銹。

賽後沙治奧拉莫斯喺社交網上載慶祝入波相片話：「用勝利、入波、零封及獲得MVP慶祝生日，真係冇得頂，感謝大家嘅祝福。」沙治奧拉莫斯將於季尾約滿，以佢現時狀態，隨時有可能續約。

另一場西甲，第2位巴塞隆拿憑拉芬夏比洛尼入波，主場以1比0擊敗拉斯彭馬斯，落後踢少1場嘅榜首皇馬5分。