C朗做後備　艾納斯靠拿樸迪補時入波絕殺

周六(6日)凌晨沙特阿拉伯聯賽，艾納斯玩輪休，正選陣容收起C朗、沙迪奧文尼、波索域、阿歷士迪尼斯等球星，結果幾乎出事，要踢到補時先至憑中堅拿樸迪頂入角球，作客險勝達馬克1比0，取得聯賽4連勝。

艾納斯剛於周中踢完聯賽，加上將於下周二(9日)凌晨超級盃對希拉爾，所以教練路斯易卡斯度今仗畀大部份主力休息，11人正選陣容有9人係本土球員，僅門將奧斯賓拿、中堅拿樸迪係外援，導致上半場佔唔到優勢。

換邊之後，路斯易卡斯度始終要換入球星救亡，包括C朗66分鐘後備上陣，呢位葡萄牙國腳果然發揮作用，曾經作出妙傳，可惜隊友加列比攻門中楣彈出。

戰至補時，眼見艾納斯即將失分之際，波索域開出角球，由拿樸迪頂入以1比0絕殺對手。由於榜首希拉爾都贏波，第2位艾納斯仍然落後對方12分，餘下7場聯賽想反超前奪冠軍，機會非常渺茫。