【有片】西班牙炒北愛 耶馬個人表演
西班牙強勢迎接歐國盃！「狂牛兵團」繼日前5比0炒安道爾後，周日(9日)凌晨決賽周前最後一場熱身賽，再喺主場5比1大勝北愛爾蘭，當中16歲新星耶馬光芒四射，瘋狂蹂躪客隊防線兼交出2次靚助攻，尾段被換走嗰陣獲全場球迷起立致敬，勢必成為歐國盃矚目新星。
西班牙今仗強陣出擊，但開波唔夠2分鐘就大意先失，佢哋重新組織後，11分鐘由柏迪遠射追平，短時間內再由艾華路莫拉達同柏迪建功反超前3比1。右翼耶馬全場不斷製造攻勢，35分鐘一次精妙笠傳，畀入楔嘅法比安彭拿撞入；60分鐘耶馬再喺底線逼甩對方，傳中畀奧耶沙巴爾射成5比1。
耶馬喺72分鐘被調離場嗰陣，全場球迷同領隊富安迪都起立鼓掌致敬，佢今場6次扭波過人有5次成功，仲有5次關鍵傳送同2次製造黃金機會。呢位巴塞隆拿新星自從做大國腳後，7場國際賽有2入波+3助攻，已鎖定西班牙正選右翼位置。如果佢喺決賽周出場，將成為歐國盃史上最年輕上陣球員。