葡萄牙出局後打破沉默　C朗：應得到更多

葡萄牙喺歐國盃8強出局，王牌球星C朗拿度更加食白果，未有為球隊貢獻入球，事隔一日後呢位星級鋒將周六終於打破沉默，出現個人社交平台並堅稱球隊和球迷喺今年比賽「應該得到更多」。

「我哋想要更多，我哋應該得到更多。為咗我哋，為咗你哋每一次，為咗葡萄牙！」收拾傷感心情後，39歲嘅C朗在社交平台抒發情緒，呢位球壇傳奇亦暗示，儘管年紀唔細，但仍將想繼續成為國家隊一員，挑戰2026年世界盃。

「我哋感謝你哋一直對我哋嘅付出及支持，無論場上或場下，我相信這個遺產會得到尊重，並會繼續建立；共同努力。」C朗喺今屆歐國盃嘅法定時間未有取得入球，只係對斯洛伐克同法國兩場，射入兩個12碼，惟對法國一戰祖奧菲歷斯嘅12碼被撲出，令葡萄牙未能再走前一步。