連迪路夫遭「雪藏」　準備去跟摩連奴搵食

曼聯今夏簽入約羅之後，準備出售另1位中堅域陀連迪路夫，根據英國《每日電訊報》爆料，呢位30歲瑞典國腳嘅經理人正在同一間球會商討加盟事宜，據悉買家係由前曼聯主帥摩連奴執教嘅費倫巴治。

由於域陀連迪路夫並非曼聯正選，加上只剩下1年合約，並冇自動續約條款，會方希望今夏出售佢，以免明年人財兩失，所以領隊坦哈格冇預佢踢季前熱身賽，避免受傷影響交易計劃。

根據《德國轉會市場》估值，域陀連迪路夫身價為1,500萬歐元(約1.27億港元)，加上只剩下1年合約，相信曼聯唔會要求太高轉會費。

費倫巴治有份參加今屆歐聯外圍賽，教練摩連奴希望增兵提升實力爭取晉級正賽，佢執教曼聯時期，一手促成紅魔鬼簽入域陀連迪路夫，想再同呢位愛將合作。

曼聯上年將中場費特出售畀費倫巴治，今次賣埋域陀連迪路夫畀呢支土耳其球隊，並唔出奇。