【有片】英冠史上最癲失機 主帥：足球經典
周六(14日)英冠出現經典一幕，打比郡主場對卡迪夫城嘅比賽，完場前打比郡前鋒艾保爾亞當斯快速反擊，爆過埋出迎嘅門將對住大大個空門，點知射門一腳竟然將個波送出柱邊，超離譜失機連打比郡領隊保羅華尼都話：「呢一幕會成為足球經典」。
打比郡今場28分鐘入波領先，卡迪夫城尾段群起反撲，全軍壓前下被反擊，艾保爾亞當斯頂贏出到中圈嘅門將，一條大路直奔空門，勢估唔到爆入禁區起腳突然腳軟，個波慢流柱邊出界，艾保爾亞當斯射完後都扒喺草地冇面見人。
打比郡最終贏1比0，所以領隊保羅華尼賽後都有心情笑埋一份：「我覺得好搞笑！我記性麻麻，但呢場波喺未來幾年都會被奉為『艾保爾之戰』，就好似當年利物浦羅辛度嘅失機(對維拉)一樣永遠流傳。」艾保爾亞當斯今夏先至由卡迪夫城正式加盟，有球迷笑佢倒戈失機，係要「報因」。