艾華利斯入絕殺球　馬體會贏波創紀錄

周五(27日)凌晨西甲，祖利安艾華利斯踢出身價波，踢到90分鐘射入全場唯一入球，協助馬德里體育會作客以1比0擊敗切爾達，近4場聯賽贏3場，馬體會亦成為史上贏切爾達最多次嘅球隊，達到31次。

祖利安艾華利斯今夏以9,500萬歐元(約8.25億港元)巨額轉會費，由曼城加盟馬體會，原本被寄予厚望，但初季表現欠佳，首4場聯賽都食白果，直至早前對華倫西亞，先至入波開齋。

呢位24歲阿根廷國腳今場屈居後備，等到54分鐘上陣，雖然比賽時間唔多，但表現活躍，有24次觸球，2次射門入1球，當時踢到90分鐘，基沙文長傳入禁區，艾華利斯近門射入成1比0。

值得一提，祖利安艾華利斯今季為馬體會所入嘅2球，都係後備上陣射入，最諷刺係佢因為不滿效力曼城期間，上陣時間不足而離隊，估唔到轉投馬體會後，都係繼續扮演「後備殺手」角色。

馬體會聯賽7戰取得4勝3和，有15分在手，排第3位，落後榜首巴塞隆拿6分。