中國隊生死戰挫印尼　入球功臣激動落淚

世盃外亞洲區第三圈C組周二(15日)晩上演生死戰，中國主場迎戰印尼，小組3連敗嘅中國谷底反彈，以2比1力挫印尼，打開小組勝利之門，為爭取小組第4名燃起希望，前鋒張玉寧射入第2球後，激動落淚。

國足經歷連場慘敗，將帥壓力巨大，王牌射手武磊因傷缺陣下只能殘陣出戰，反觀印尼正選陣容擁有9名歸化球員，賽前預計是一場硬仗，如果中國落敗，爭取第4名晉級下一圈機會將大大降低。

中國對上兩場都是先開紀錄一方，今場都唔例外，21分鐘一次罰球攻勢，蔣聖龍底線前伸腳將個波送回門前，拜合拉木近門抽射破網，中國領先1比0。

上兩場先入波嘅中國最終被反勝，今次終於擺脫魔咒，44分鐘張玉寧單刀射成2比0，為國足取得「保險球」，入波後張玉寧激動落淚，可見呢段時間國足壓力有幾大。

國足球員體力用得七七八八，下半場改採守勢，一度被印尼狂攻，終在86分鐘失守，印尼追成1比2，不過為時已晚，中國隊保住2比1勝局完場。

中國隊全取3分後與印尼同分，不過中國得失球落後太多，仍然排榜尾，要爭出線仍需繼續努力。