莫拉達破7場入球荒　西班牙大炒塞爾維亞

周三(16日)凌晨歐國聯A4組，西班牙主場以3比0大勝塞爾維亞，前鋒艾華路莫拉達經歷地獄與天堂，射失12碼，幸好最後都入番1球，打破7場國際賽入球荒，同時將國家隊累積入波數字增添至37球，落後第3位費蘭度托利斯1球。

雖然雙方首循環打和0比0，但西班牙今仗佔有壓倒性優勢，全場有29次射門，反觀塞爾維亞只有3次。開賽5分鐘，「鬥牛兵團」打開紀錄，柏度樸路右路傳中，拿樸迪頂入，中場米基爾馬連奴亦有1次頭槌攻門，可惜中柱彈出。

換邊後冇耐，西班牙獲得12碼，艾華路莫拉達主射竟然高出，但呢位效力AC米蘭嘅31歲前鋒知恥近乎勇，65分鐘冷靜射成2比0，自今年6月歐國盃對克羅地亞之後，再次取得國際賽入波。比賽後段，阿歷斯巴爾拿射入美妙罰球，鎖定3比0勝局，兩隊歷來5次交鋒，西班牙首次可以淨贏3球。

西班牙贏波之後，領先第2位丹麥3分，並多第3位塞爾維亞6分。