南野拓實2射1傳　歐聯史上最強日本人

周三(23日)凌晨歐聯，摩納哥主場以5比1大勝貝爾格萊德紅星，中場南野拓實射入2球及貢獻1次助攻，成為歐聯創立69年以來，首位單場做出2射1傳嘅日本球員。

開賽20分鐘，南野拓實突破越位單刀射入打開紀錄，其後貝爾格萊德紅星博到12碼扳平，但摩納哥始終佔盡上風，上半場補時，由比列安保路射入再次領先。

換邊之後，摩納哥中堅韋費特辛高離門30幾碼遠射入世界波拉開紀錄，呢支法甲勁旅攻勢一浪接一浪，南野拓實再入1球，並於補時傳畀艾利奧捷射成5比1完場。

南野拓實演出光芒四射，當選今場最佳球員，根據統計，呢位29歲中場成為繼2017年基利安麥巴比之後，近7年首位歐聯梅開二度嘅摩納哥球員，同時繼香川真司之後，第2位單場歐聯入2球嘅日本球員，佢比香川真司更犀利之處係入2球之外，仲有1次助攻，難怪被封為歐聯史上最強日本人。

至於另1支法甲球隊巴黎聖日耳門表現遜色，靠阿舒拉夫入波，主場逼和燕豪芬1比1。