摩連奴食紅牌炮轟球證：曼聯唔輸「執到」！

曼聯喺歐霸盃作客費倫巴治打和1比1，倒戈嘅摩連奴果然成為焦點人物，佢喺下半場因為投訴過激被趕出場，賽後就「曲線」炮轟球證漏判12碼，直指費倫巴治係表現更好一隊，曼聯和波已經「執到」。

費倫巴治下半場追成1比1後，文路爾烏加迪喺禁區內疑似踢跌森姆，不過球證未有表示，摩連奴喺場邊激烈投訴後被逐。「寸王」賽後曲線批評球證：「球證同我講，佢隻眼睇住禁區內12碼情況，同時亦望到我喺教練區嘅行為，我恭喜佢有咁神奇嘅能力，呢個就係佢成為歐洲最佳球員之一嘅原因。」

對於兩隊表現，摩連奴亦唔客氣：「公平講我哋踢得非常好，好過曼聯，所以係曼聯喺我哋身上執到1分，而唔係我哋執到1分，打和對曼聯嚟講係好成績。」摩連奴亦點名讚揚曼聯門將奧拿拿，指佢上半場連環勇救安尼斯利兩次必入頭槌，係拯救曼聯嘅最大功臣。