夏蘭特睇瑞典超　都唔捧洛迪場

除咗皇馬全隊杯葛金球獎頒發禮之外，曼城射手艾寧夏蘭特亦冇現身捧隊友洛迪卡斯簡迪場，而係去瑞典睇馬模對哥登堡，呢位上屆金球獎排第2位嘅球星認真唔畀面，莫非夏蘭特都認為主辦機構《法國足球》黑箱作業，所以作出無聲抗議？

雖然曼城將於周四(31日)凌晨英聯盃對熱刺，但艾寧夏蘭特可能會獲得輪休，所以佢飛去瑞典，身穿馬模球衣入場睇波。據悉夏蘭特此行係為效力呢支瑞典勁旅嘅老友艾歷保菲姆打氣，兩人同樣24歲，當年效力挪威U18，已經係小國腳隊友，並一齊玩音樂，友情非常深厚。加上馬模今場只要贏波，就可以奪得聯賽冠軍，所以夏蘭特專程去為艾歷保菲姆打氣。

包括艾歷保菲姆在內，馬模今仗有4位挪威球員擔任正選，加上觀眾席上嘅艾寧夏蘭特，呢股挪威勢力支持下，馬模最終以2比1反勝哥登堡，提早2輪成功衞冕瑞典超。