曼聯新陣大輸家？4大翼鋒面臨尷尬前景

曼聯新帥魯賓艾摩廉上任後，盛傳將會改踢慣用嘅3-4-3陣式，近日操練亦演練呢套全新戰術，令球迷耳目一新。不過喺新陣式入面，翼鋒嘅生存空間將會受到壓縮，令曼聯4位翼鋒拉舒福特、阿歷真度加拿祖、阿密特迪亞路同安東尼馬菲奧斯面臨尷尬情況。

艾摩廉嘅曼聯首演在即，前英格蘭國腳瑟頓表示：「喺呢套新嘅3-4-3陣式入面，我好有興趣知道部份球員會點融入，兩隻翼衞會係由兩閘出任定係翼鋒出任？係馬沙拉奧搭達洛治、定係加拿祖搭迪亞路？好想知道艾摩廉個決定係點樣。」

根據艾摩廉喺士砵亭慣常做法，兩翼衞通常由1個傳統閘位球員同1名翼鋒出任，艾摩廉首課操練入面，翼衞就係由安東尼同杜維爾馬拉西亞出任。如果情況不變，曼聯4個翼鋒只能爭逐1個正選位置，而當中最有防守能力嘅，就係今季被打入冷宮嘅安東尼，艾摩廉最後點排陣，球迷拭目以待。