般費賣口乖：我願意踢任何位置

曼聯新帥魯賓艾摩廉慣用343陣式，並冇傳統中場「10號位置」，令一直扮演呢個角色嘅隊長般奴費南迪斯處境尷尬。不過，呢位葡萄牙國腳表示，只要有得上陣，願意踢任何位置。

般奴費南迪斯話：「我同艾摩廉傾過，只要有得上陣，我可以踢任何位置，雖然我踢10號或者8號位效果最好，但我係1位可以快速適應嘅球員，之前都踢過6號位、翼鋒，甚至中鋒，所以踢任何位置都冇問題，都可以發揮出高水平。」

葡萄牙傳媒指魯賓艾摩廉最重視球員紀律，但般奴費南迪斯經常喺比賽中做出埋怨行為，並不時用高風險傳球，或者浪射，艾摩廉唔鍾意般費呢類型球員，隨時正選不保，難怪佢開始有危機感，講定願意踢任何位置。