拉舒福特又被踢出大軍名單　艾摩廉咁解釋

曼聯出戰周五(20日)凌晨英聯盃8強作客熱刺，2位上輪英超「曼市打吡」遭棄用嘅「壞孩子」命運各異，阿歷真度加拿祖今仗重返大軍名單，並有份後備上陣，但拉舒福特繼續落選，領隊魯賓艾摩廉表示，只會揀選有能力應付大戰嘅球員，明顯指「福仔」無心戀戰，離隊已成定局。

拉舒福特無緣上場對曼城嘅大軍名單，接受訪問時透露，準備好接受「新挑戰」，暗示將會離隊，呢位27歲英格蘭前鋒又缺席今場英聯盃，進一步令人懷疑佢嘅紅魔鬼生涯已玩完。

領隊魯賓艾摩廉被傳媒問到點解「福仔」又落選，就話：「我會觀察球員過去一星期表現，揀選身心都已經準備好，並有能力應付激烈比賽嘅球員，我對每位球員都用相同準則，並冇針對拉舒福特。」賽前拉舒福特將社交平台頭像轉為黑色，似乎心情非常惡劣。

另外，魯賓艾摩廉指阿歷真度加拿祖近日操練期間，表現出色，所以重新揀選佢入大軍名單。