連迪路夫悲情受傷　紅魔生涯或提早玩完

曼聯喺英聯盃8強被熱刺淘汰出局之外，仲損兵折將，中堅域陀連迪路夫喺臨完上半場受傷退下火線，呢位30歲瑞典國腳不禁悲情痛哭，似乎傷勢唔輕，加上盛傳會方打算出售佢，7年紅魔生涯或提早玩完。

域陀連迪路夫喺開季前已經受傷患問題困擾，直至10月初先至復出，各項賽事僅上陣9次，當中大部分時間擔任後備，難得今場踢正選，卻不幸再次受傷。賽後曼聯領隊魯賓艾摩廉表示，仍未知域陀連迪路夫需要抖幾耐：「連迪路夫出現一啲問題，需要進行評估，先至可以確定實際情況，佢一直非常努力工作。」

曼聯今夏簽入2位中堅馬菲斯迪歷特、約羅之後，令原本只屬於副選嘅域陀連迪路夫面臨被出售，加上佢今季受傷患困擾，恐怕前途更加悲觀。曾經傳出意甲球隊AC米蘭打算簽入域陀連迪路夫，但佢今次受傷，可能影響轉會交易。