AC米蘭慘勝　鋒線再傷一位主將

周六(21日)凌晨意甲，成績欠佳嘅老牌豪門AC米蘭作客以1比0擊敗維羅納，但亦付出沉重代價，翼鋒拉菲爾利亞奧受傷退下火線，令原本已經人腳不整嘅鋒線雪上加霜，增加未來搶分難度。

AC米蘭今場比賽之前嘅5場意甲僅1勝，教練方辛加再次面臨下台壓力，但球隊上半場具威脅攻門唔多，更加有拉菲爾利亞奧踢到32分鐘拉傷大腿，無法繼續比賽，削弱鋒線實力。

幸好AC米蘭中場雷恩達斯腳風順，下半場射入全場唯一入波，呢位26歲荷蘭國腳近4次聯賽上陣有3球進帳，最重要係AC米蘭全取3分後，避免被前4位球隊進一步拋離。

AC米蘭近期備受傷兵問題困擾，有8位球員養傷，包括3位進攻主將艾華路莫拉達、基斯甸普列錫、羅夫度斯卓克，拉菲爾利亞奧今仗受傷後，令中前場人腳更加緊張。賽後教練方辛加透露，呢位葡萄牙國腳傷勢並唔嚴重，希望趕及復出踢12月30日凌晨意甲主場對羅馬。