【有片】沙卡疑受重傷 要拎拐杖離場
阿仙奴近10場賽事7勝3和氣勢正盛，不過周日(22日)凌晨大勝水晶宮亦付出代價，王牌球星布卡約沙卡喺上半場傷出，賽後更被影到要拎住拐杖離場，疑似受到重創，領隊阿迪達承認沙卡傷勢令人憂心。
沙卡今場24分鐘一次右路底線傳中後，突然按住右腳大腿坐地不起，最後喺軍醫治理後拐住離開，而賽後影片所見，呢位英格蘭國腳要拎住枴杖步離球場，懷疑大腿肌肉拉傷，可能要缺陣一段時間。
阿仙奴領隊阿迪達賽後表示：「沙卡覺得大腿有啲唔妥，唔可以繼續比賽，情況令人憂心。我唔清楚傷勢有幾嚴重，但要被換走肯定唔係好消息，我哋只能夠等待佢嘅檢查報告。」
原本布卡約沙卡受傷，夏天借用嘅史達寧將大派用場，不過阿迪達證實史達寧喺賽前嘅練習亦告受傷，未知幾時可以復出，球隊只剩加比爾馬天尼利同李安度杜沙特兩名翼鋒。