伊沙克「戴帽」　艾迪侯域：佢係非賣品！

周六(21日)英超賽事，紐卡素憑大勇嘅前鋒阿歷山大伊沙克連中三元，作客4比0大破葉士域治。今場係伊沙克喺英超首次「戴帽」，領隊艾迪侯域賽後向一眾有意挖角嘅豪門表明：「伊沙克係非賣品！」

紐卡素今場順風順水，開波26秒就由伊沙克射入領先，積及梅菲32分鐘增添紀錄，伊沙克之後再喺完半場前以及54分鐘入波，個人大演「帽子戲法」，帶領紐卡素大勝4比0。

伊沙克係自2003年阿仙奴嘅龍格保後，首個喺英超「戴帽」嘅瑞典球員，同時亦係2019年嘅艾約斯佩雷斯後，5年來首個「戴帽」嘅紐卡素球員。

今季已入10球嘅伊沙克，盛傳係阿仙奴收購目標，不過艾迪侯域賽後表示：「我最驚奇嘅係，原來今次只係伊沙克第1次入3球。我同紐卡素從來冇打算賣走伊沙克，佢喺球會嘅長遠計劃之內，係個頂尖球員。」