夏蘭特羞家數據曝光　主動攬責：係我嘅錯！

曼城近期一直沉淪，輸畀阿士東維拉後，近12場比賽輸咗9場，而喺最近嘅3連敗入面，前鋒艾寧夏蘭特唔單止冇波入，就連射波、交波都近乎冇貢獻，呢位挪威射手賽後亦主動攬責，表示曼城輸波「係我嘅錯」。

曼城最近連續輸畀祖雲達斯、曼聯同阿士東維拉，夏蘭特喺呢3場比賽踢足270分鐘，不過就交出0入波、0助攻、0扭波、0關鍵傳送數據，3場加埋只得1次中目標射門，而且合共只完成19次傳球，平均每場只傳6腳波，近乎隱形。

夏蘭特賽後自責：「首先我要檢討自己，我踢得唔好，關鍵時刻我入唔到波，我哋控制唔到比賽、贏唔到波，我需要更加努力，所有嘢都要改善。」不過領隊哥迪奧拿就回應：「我唔同意夏蘭特，如果曼城冇咗佢會更慘，不過我鍾意球員有呢種態度，亦係球隊唯一走出低谷嘅方法。」