日本奇兵2射1傳　基爾勁爆200倍波膽

日本球員人才輩出，今季又有1位奇兵喺德甲冒起，效力新升班球隊基爾嘅前鋒町野修斗，喺周六(21日)晚聯賽，射入2球及1次助攻，協助基爾以5比1大勝奧格斯堡，結束5連敗頹勢，搶到護級寶貴3分。

開賽5分鐘，基爾就落後，幸好町野修斗有出色發揮，橫傳畀拉斯洛辛邦射入扳平，跟住菲利夏利斯梅開二度，協助基爾反超前。町野修斗喺39分鐘射入罰球，加上補時再建一功，基爾大勝5比1，爆出200倍波膽。

主角町野修斗一戰成名，佢上年夏天由日職球隊湘南比馬轉投當時仲係德乙球隊嘅基爾，上季聯賽上陣31場射入5球及4次助攻，成為基爾獲得升班資格嘅功臣。

町野修斗踢德甲，表現更加出眾，14次披甲已有6球進帳及1次助攻，德國傳媒認為佢並非池中物，相信好快會成為大球會爭奪目標。