皇馬救星到　阿拉巴下月可以復出

西甲豪門皇家馬德里今季備受防線傷兵問題困擾，包括2位後衞丹尼爾卡華積、艾達米列達奧重傷提早收咧，幸好球隊現時傳來好消息，養傷近1年嘅中堅阿拉巴即將可以參加團隊操練，有望下月上陣比賽。

阿拉巴上年12月因為膝部受傷，需要接受手術，並一直缺陣，根據教練安察洛堤最新透露，呢位32歲奧地利國腳已經接近復出：「阿拉巴將於12月30日參加團隊操練，準備下月中復出比賽，佢回歸絕對係一件令人興奮嘅消息。」

皇馬近期需要用防守中場曹亞文尼客串踢中堅，防線難免不穩，阿拉巴下月復出，對於下半季爭奪有重大幫助。

與此同時，皇馬有可能趁下月冬季轉會市場重開簽入中堅，盛傳目標係效力沙特阿拉伯豪門艾納斯嘅西班牙國腳拿樸迪。