曼城王朝瓦解　因放走「冠軍童子」艾華利斯

英超4連冠嘅曼城今季全面潰敗，射手艾寧夏蘭特近期踢到隱形，令人懷念今夏離隊嘅前鋒祖利安艾華利斯。加上呢位24歲阿根廷國腳協助馬德里體育會上場聯賽擊敗巴塞隆拿，現時排西甲榜首，難怪網民紛紛認為曼城出售呢位「冠軍童子」，成為王朝瓦解主因。

祖利安艾華利斯效力曼城2季，扮演艾寧夏蘭特嘅副選，雖然入波數字唔算多，但往往發揮關鍵作用，特別係當夏蘭特受傷，或者缺態嘅時候，艾華利斯可以大派用場。曼城今夏以9,000萬歐元(約7.3億港元)將艾華利斯出售畀馬體會，雖然獲得豐厚收入，但同時失去1位鋒線重要人物，「藍月亮」陷入低潮，領隊哥迪奧拿冇咗一大變陣選擇。

同埋艾華利斯擁有「冠軍命」，年紀輕輕已經捧過世界盃、美洲國家盃、南美自由盃、英超、英足盃、歐聯、世冠盃等多項大賽冠軍，馬體會現時排西甲榜首，佢今季隨時捧埋西甲冠軍都唔出奇，屆時曼城肯定更加後悔放走呢位「冠軍童子」。