麥巴比轟世界波領皇馬大勝：適應期已完結！

周一(23日)凌晨西甲，皇家馬德里主場4比2大勝西維爾，壓倒巴塞隆拿升上第2位，只落後榜首馬德里體育會1分。皇馬前鋒基利安麥巴比今場轟入世界波，連續4場比賽取得入球，佢賽後亦霸氣宣稱：「適應期已完結」，寓意自己將會大爆發！

拎完洲際盃冠軍嘅皇馬，今場表現相當勇猛，麥巴比10分鐘喺鵝眉月頂轟入世界波領先，10分鐘後輪到費達歷高華維迪離門30碼抽入，洛迪高高斯34分鐘射成3比0，西維爾隨即由艾錫羅美路追番1球。53分鐘麥巴比助攻巴謙戴亞斯建功，西維爾完場前追多球於事無補，皇馬輕鬆贏4比2。

麥巴比自從月初對畢爾包12碼宴客後，近4次上陣都有入波，呢位法國前鋒賽後表示：「我知道我可以有更多貢獻，近幾場我表現好咗，對畢包爾場波係谷底，嗰刻我知道要傾盡全力同展現更多個性，我嘅加盟令球隊出現好多轉變，但正如教練所講，我嘅適應期已經完結！」