曼聯噩夢重現　艾摩廉成績衰過坦哈格？

曼聯喺英超主場吞般尼茅夫3蛋，新領隊魯賓艾摩廉上任後9場波嘅戰績，只有4勝1和4負，而且失球數字明顯急升，最衰過坦哈格被炒魷之前嘅時間，令艾摩廉嘅戰術開始受到質疑。

艾摩廉領軍9場輸咗4場，入17球又失咗17球，如果對比番坦哈格被炒前最後9場，曼聯戰績係2勝5和2負，入15球但只失11球，無論輸波次數同失球數字，都係坦哈格略勝一籌。

考慮到約羅、利辛度馬天尼斯、美臣蒙特、杜維爾馬拉西亞等球員，都係艾摩廉上任後先傷愈復出，理論上艾摩廉應該有更好資源去爭取好成績，但結果都係令人失望。

諷刺嘅係，曼聯今季最「甜蜜」嘅時光，就係看守領隊雲尼斯達萊執教嘅4場，拎到3勝1和佳績。