福仔被雪照現身撐隊友　加利仔：佢係干擾！

曼聯前鋒拉舒福特同領隊魯賓艾摩廉嘅關係持續冰封，周日(22日)對般尼茅夫嘅聯賽，「福仔」連續第3場被踢出大軍名單，不過呢位英格蘭前鋒仍然現身奧脫福支持隊友，但名宿加利尼維利就唔客氣狠批，指拉舒福特已成曼聯一大干擾。

曼聯今場用約舒亞舒克斯擔正，海倫就做後備，日前發表離隊宣言嘅拉舒福特就連續3場冇份進入大軍名單。「福仔」今場仍然到場，賽前被影到喺球場內為小球迷簽名合照，據報亦有進入更衣室同隊友打招呼，似乎未受被雪藏影響心情。

曼聯名宿加利仔就話：「如果你1個星期前問我，拉舒福特1月會唔會離開，我會答冇可能。如果你每個星期都問拉舒福特會唔會走，佢就會成為艾摩廉嘅一大干擾，每個記者會焦點都落喺拉舒福特身上，呢個情況佢就非走不可。」