維拉準備賣屈堅斯　英超列強吼實

阿士東維拉近年極速起飛，英格蘭前鋒奧尼屈堅斯功不可沒，不過隨住新星祖漢杜蘭冒起，屈堅斯近期已被貶為後備，據報維拉甚至打算將佢賣走，熱刺、阿仙奴同利物浦等曾經傳出對佢有興趣嘅球會都吼到實。

屈堅斯今季雖然已有7個英超入球，不過整體演出有所下滑，最近3場聯賽更被祖漢杜蘭搶走正選，而祖漢杜蘭喺呢3場都有入球，屈堅斯想重奪正選難度極高。28歲嘅屈堅斯日前亦承認：「維拉今季整體發揮好好，但就我個人而言，今季係跌跌碰碰，喺歐國盃後仲未搵番自己嘅節奏，但我會盡力嘗試。」

祖漢杜蘭已成維拉嘅未來，據報佢哋有意趁屈堅斯價值仍然高企，提早將佢賣走，除熱刺、阿仙奴同利物浦外，有德甲同西甲球會都對佢有興趣，勢必掀起一場爭奪戰。消息指維拉一旦賣走屈堅斯，將會收購依家效力AC米蘭嘅卓禾斯作替補。