「小雲」提早放假過聖誕　遠走美國睇波

新鮮出爐嘅世界足球先生雲尼斯奧斯祖利亞因為停賽，冇份為皇馬出戰上場西甲對西維爾，可以提早放假歡度聖誕。呢位24歲巴西國腳選擇飛去美國邁阿密，並入場睇美式足球邁阿密海豚嘅賽事。

雲尼斯奧斯祖利亞因為累積足夠黃牌，自動停賽1場，佢於是向教練安察洛堤申請提早放假，並獲得批准。「肥安」曾經表示，球員好需要假期休息，鼓勵佢哋盡量抽時間「叉電」，所以好支持「小雲」今次美國之旅。

雲尼斯奧斯祖利亞選擇去邁阿密享受陽光與海灘，並順道入場睇美式足球邁阿密海豚主場對三藩市49人，賽前邁阿密海豚透過官方社交網介紹呢位世界足球先生大駕光臨，佢戴上太陽眼鏡喺球場影相，非常招積，「小雲」好腳頭，睇住邁阿密海豚贏波。