貼聖誕樹溫馨照再捱轟　沙拿闊佬懶理

利物浦前鋒穆罕默德沙拿今季狀態巔峰，球場上嘅表現可以話無可挑剔，不過佢周三(25日)喺社交網分享同家人喺聖誕樹前溫馨合照，就被穆斯林球迷猛烈批評。事實上，沙拿每年聖誕節都會貼出慶祝聖誕相片，對外界指控闊佬懶理。

沙拿貴為世界著名嘅穆斯林，高調慶祝天主教、基督教嘅節日令大批伊斯蘭教徒不滿，今年佢同老婆以及兩個囡囡，着住紅黑色格仔衫，喺精美嘅聖誕樹同薑餅人前合照，但唔少球迷留言：「我對你好失望」、「邊個逼你咁做」、「請盡快刪除相片」等等...

其實呢次「聖誕樹風波」係每年上演，事關沙拿近幾年嘅聖誕節，都會貼出一張同家人喺聖誕樹前慶祝相片，不過有球迷就指沙拿曾經喺2020年聖誕節「貼相」後，利物浦之後連續5場聯賽不勝，擔心會成為一個「詛咒」。