子承父業！施多夫囝囝入AC米蘭一隊

意甲名牌AC米蘭備戰下周對羅馬嘅賽事，日前操練有新面孔登場，U18中場新星丹素施多夫獲提拔上一隊，聽佢個名就知佢來頭唔細，丹素嘅爸爸就係「紅黑兵團」傳奇施多夫，今次可望子承父業。

荷蘭名將施多夫喺2002年至2012年效力AC米蘭，幫球隊贏過2次意甲冠軍同2次歐聯冠軍，囝囝丹素施多夫同爸爸一樣司職中場，12歲開始就加入AC米蘭青年軍，今次獲提拔上一隊，係對佢表現嘅肯定。

丹素嘅冒起受到廣泛關注，喺米蘭出世嘅佢可以選擇代表意大利同荷蘭之外，由於媽媽係巴西人，佢亦可以揀代表巴西國家隊。丹素施多夫表示：「做職業球員要好強心理質素，我相信自己能力，否則我唔會踢緊AC米蘭。」