利物浦撥開大霧　帶開7分冠軍在望

周五(27日)凌晨英超賽事，利物浦喺大霧籠罩下3比1反勝李斯特城，並且乘住次席車路士輸波，將榜首領先優勢拉開到7分兼且踢少1場，英超冠軍獎盃在望！

今場比賽出現大霧，賽前一度出現改期危機，不過最終都照常開波。6分鐘李斯特城嚇人一跳，由佐敦阿休射入領先，不過利物浦之後控制大局，完半場前憑加普精彩熨射追平。

下半場「紅軍」繼續進攻，49分鐘居迪斯鍾斯近門射入，82分鐘再由穆罕默德沙拿妙射鎖定3比1勝局。沙拿已連續10場聯賽交出入波或助攻，亦係佢英超生涯第3次(連續10場貢獻入波)，成為史上第1人。

利物浦領隊施洛賽後表示：「話冇睇積分榜係好奇怪，不過我唔會喺仲有20輪未踢情況下慶祝，2個月前我哋仲落後曼城1分，證明受傷、停賽或者行衰運可以有好大影響，我哋要準備好迎接下場賽事。」