車路士輸波　馬度基「技術原因」被踢走

周四(26日)英超賽事，車路士主場1比2不敵富咸，連續2場聯賽痛失5分，同「1哥」利物浦距離愈嚟愈遠。車路士表現跌Watt，更衣室問題亦開始浮現，馬度基今場因「技術原因」被踢出大軍名單，而祖奧菲歷斯再一次冇份落場，同樣引嚟質疑。

車路士今場16分鐘就由高爾彭馬打開紀錄，以為佢繼續「單天保至尊」，但作客嘅富咸不斷嘗試，82分鐘由哈利威爾遜近門頂入追平；去到補時5分鐘，富咸快速反擊由洛迪高梅尼斯「絕殺」，令富咸45年來首次喺史丹福橋球場贏波。

車路士被利物浦進一步甩開，更衣室危機亦浮現，右翼馬度基今場意外冇份入選大軍名單，領隊馬利斯卡賽後解釋係「技術原因」，傳聞係佢訓練態度同紀律出現問題。另外，祖奧菲歷斯今場坐足90分鐘，近4場聯賽只係試過1次喺91分鐘後備入替，馬利斯卡表示：「菲歷斯嘅問題係佢同高爾彭馬踢同一個位置，雖然佢哋可以一齊上陣，但為球隊平衡只能咁樣(棄用菲歷斯)。」