曼聯走寶！艾蘭加射爆熱刺　森林創29年紀錄

諾定咸森林繼續扮演今季英超「神奇球隊」，佢哋周四(26日)主場1比0擊敗熱刺，升上聯賽榜第3位，英超4連勝更係球隊29年來最強走勢，而「曼聯棄將」安東尼艾蘭加翻生演出，就係森林冒起嘅重要原因。

森林1年前搵紐奴執教後，成績穩步上揚，瑞典翼鋒艾蘭加嘅進步最明顯，今場28分鐘一次招牌快速反擊，就由艾蘭加射入全場唯一入球。22歲嘅艾蘭加已連續3場入波，上季開始至今交出19個入球貢獻(8入波+11助攻)，喺英超所有22歲或以下球員當中，僅次於高爾彭馬。

森林贏波後升上第3位，亦係球隊自1995年5月後，首次喺英超錄得4連勝，領隊紐奴賽後表示：「聯賽榜冇乜意義，事實上我哋未有得到任何成就，最重要係球員相信自己，只要隊中每個人都相信自己好重要，我哋有能力競爭(歐洲賽席位)。」