冇傷冇病　馬拉西亞遭艾摩廉棄用

曼聯近期走勢向下，點兵用人成為談論焦點，除咗拉舒福特被踢出大名單，荷蘭後衞杜維爾馬拉西亞亦喺對狼隊一仗消失，據報佢冇傷冇病，被棄用係魯賓艾摩廉嘅決定。

馬拉西亞於2022年夏天由飛燕諾來投，係坦哈格時期首批加盟球員之一，但佢上季經歷嚴重膝傷，全季缺陣成為失緃人口，直至近期先傷愈歸隊，加盟曼聯兩季半僅上陣43場。

馬拉西亞司職左閘，球迷一般認為佢傷愈復出可填補曼聯左閘位置空缺，不過艾摩廉似乎唔係咁buy佢，佢近期復出後4次正選上陣，有3次半場被換出，包括上場對般尼茅夫，馬拉西亞獲派正選登場，出任左翼衞，但僅踢半場就被換出，改用約羅，結果曼聯該仗淨吞3蛋。

到今場對狼隊，艾摩廉直接棄用馬拉西亞，用利辛度馬天尼斯踢左中堅，達洛治客串左翼衞，似乎馬拉西亞喺曼聯冇運行。