般茅小將頂爆曼聯　獲皇馬垂青

早前協助般尼茅夫大炒曼聯3比0，喺奧脫福頭槌入波嘅西班牙小國腳甸恩胡積臣，據報被皇家馬德里列入增兵首選，有望「上艦」，其身價為1,800萬歐元(約1.44億港元)。

西班牙傳媒報道，皇馬後防一直唔夠人，渴望簽入優質中堅，佢哋已將目標鎖定年僅19歲嘅甸恩胡積臣。呢位身高1米95嘅中堅，今季初戰英超即有好表現，上陣13場攻入2球，阿仙奴同曼聯都吼實佢，依家更引起皇馬注視。

甸恩胡積臣於荷蘭出世，幼年時移居西班牙，在馬拉加受訓，其後轉到祖雲達斯青年軍，並於祖記出道，上季外借到羅馬，今季正式轉投般尼茅夫，而佢青年軍時期代表荷蘭U16至U19，今年轉為效力西班牙U21。