C朗自爆掛靴後大計：我要做班主

阿聯酋主辦嘅環球足球頒獎禮，皇馬成為大贏家之外，昔日「銀河艦隊」射手C朗亦有獎落袋，當選今年最佳中東球員及史上首席射手殊榮，呢位效力沙特阿拉伯豪門艾納斯嘅39歲老將透露，將來掛靴之後，唔會做教練，而係希望成為班主。

C朗今年球會及國家隊各項賽事上陣51場入43球及7次助攻，當中為艾納斯踢25場聯賽入25球及4次助攻，當選最佳中東球員絕對實至名歸。

呢位葡萄牙國腳自稱狀態更勝唔少年輕球員，因為自己喜歡競爭，同時表示己制定退休大計，希望成為球會老闆：「我有好多計劃，但一定唔會做教練，反而想成為球會老闆、會長。」C朗可能見到同胞魯賓艾摩廉現時喺曼聯陷入困境，對教波有所顧忌，但佢認為艾摩廉可以解決問題。

另外，C朗力撐雲尼斯奧斯祖利亞係現時最佳球員，值得拎金球獎，指《法國足球》將金球獎頒畀曼城中場洛迪卡斯簡迪並唔公平。