阿諾特去意已決　通知高層明夏轉投皇馬

利物浦3位主將阿歷山大阿諾特、穆罕默德沙拿、華基爾雲迪積克將於明夏約滿，下月1日開始就可以自由同其他球會傾加盟事宜，根據西班牙《馬卡報》爆料，阿諾特已經通知紅軍高層，決定明夏轉投皇馬。

利物浦一直希望同阿歷山大阿諾特續約，但經過數次開出新約，都被呢位26歲英格蘭國腳拒絕，會方現時只有兩個選擇，一係等下月冬季轉會市場重開後，出售呢位青訓產品，一係任由佢明夏約滿離隊，屆時將會人財兩失。據悉阿諾特通知利物浦高層，表明自己夢想係加盟皇馬，希望容許佢明夏轉投呢支西甲豪門。

皇馬近年簽入多位重量級自由身球員，包括基利安麥巴比、阿拉巴、魯迪格，相信已說服阿諾特來投，加上阿諾特同皇馬中場祖迪比寧咸同屬英格蘭國腳及好朋友，亦增加佢上「艦」意慾。

雖然阿歷山大阿諾特好可能走人，但《馬卡報》指穆罕默德沙拿、華基爾雲迪積克將會續約至2028年，意味呢2位老將可能效力紅軍至掛靴。