經理人飛抵英國　曼城有望簽丹尼爾奧莫救亡

曼城表現持續低迷，盛傳準備下月轉會市場重開後增兵提升實力，根據英國《每日郵報》爆料，巴塞隆拿中場丹尼爾奧莫嘅經理人安迪巴拉飛抵英國，入場睇曼城上場英超主場對愛華頓，可能向「藍月亮」推薦呢位26歲西班牙國腳。

巴塞隆拿今夏以5,000萬歐元(約4億港元)向RB萊比錫收購丹尼爾奧莫，但因為財政超標，一度未能為佢註冊，最後以中堅安達斯基斯坦臣重傷長抖為理由，使用「緊急球員條款」為奧莫註冊。條款將於月底屆滿，奧莫再次面臨失去西甲球員資格，根據合約，一旦佢未能註冊，就可以自由身離隊。

巴塞向法院提出上訴，但已被駁回，意味奧莫離隊機會愈來愈大，經理人安迪巴拉做定兩手準備，開始為呢位中場搵新球會，曼城、阿仙奴、拜仁慕尼黑都有興趣簽入奧莫。當中以曼城最積極，主帥哥迪奧拿承認隊內唔少球員建議簽人，哥帥出身巴塞，同奧莫同聲同氣，比較大機會吸引佢加盟。

不過，巴塞仲未放棄，計劃將西甲賽會告上法庭，爭取為丹尼爾奧莫保留註冊資格。