韋斯咸6人缺陣　利物浦準備又贏1場

韋斯咸近期成績有改善，近4場英超取得2勝2和，但領隊盧比迪古笑唔出，因為上仗作客修咸頓，門將法比安斯基、中堅麥斯基爾文受傷，有6位球員無法出戰下周一(30日)凌晨英超主場對榜首利物浦。

韋斯咸上場以1比0擊敗修咸頓，取得寶貴3分，但亦付出沉重代價，麥斯基爾文踢咗19分鐘就傷出，門將法比安斯基更加被撞到腦震盪，最少需要休息6日。盧比迪古話：「現時要處理傷停問題，米查利安東尼奧、卡路士蘇拿、法比安斯基、麥斯基爾文養傷，湯馬士蘇錫克、古度洛迪古斯停賽，佢哋都無法上陣對利物浦，但必須相信其他球員，佢哋已經做好準備，應付呢場大戰。」

雙方近7次對賽，利物浦取得6勝1和，加上韋斯咸殘陣出擊，恐怕更加無力同紅軍抗衡。