巴黎奧運遇劫　薛高：巴西奧委會冇理過我

71歲巴西足球名宿薛高在今夏巴黎奧運開幕前夕遇搶劫，損失慘重，佢最近講番呢次事件經過，批評巴西奧委會一直冇理過佢，全部自己硬食。

薛高今年初獲委任為巴西奧運隊大使，亦係巴西首位未出席過奧運會人士擔任此職務，可能亦因為咁，結果遭遇巴西奧委會冷待。

薛高在巴黎奧運開幕前夕遭遇匪徒搶劫，佢話：「當時奧委會安排嘅酒店所在地區係一個危險區域，冇任何保安人員，司機係外來人，當時我知道唔妥決定換酒店，但就喺出門口時遇到搶劫。」

據報薛高兩夫婦被搶去不少財物，包括現金、名貴手錶、鑽石首飾，總值高達50萬歐元。薛高表示：「除咗錢財，仲有好多有紀念價值嘅物品，呢件事令我哋好難受，亦破壞咗嚟享受奧運嘅心情，仲要喺警局逗留6小時。」

依家講番起，薛高將矛頭指向巴西奧委會：「巴西奧委會冇任何人聯絡過我，包括工作人員同主席，甚至連一個電話都冇，呢個係佢哋嘅責任，佢哋要保障任何一位大使嘅安全。」