沙卡完成手術有排抖　阿迪達準備1月買人

阿仙奴王牌球星布卡約沙卡早前大腿肌肉撕裂，周六(28日)證實要做手術根治，據報要到明年3月份先可以復出，領隊阿迪達已表明做好準備，希主1月轉會窗可以買人。

沙卡喺社交網貼相證實已順利完成手術，呢位23歲球星表示：「大部份人會見到呢個係一個難關，但少部份人會視為一個新機會，我已經展開復康療程，將會以更強姿態回歸。」

阿迪達透露：「沙卡做咗手術，一切都好順利，可惜佢會缺陣好多、好多個星期，我估計係超過2個月，但我唔清楚實際嘅時間，好視乎佢傷口嘅反應。」

對於冬季轉會窗買人，阿迪達就話：「希望到時球隊健康情況好轉，如果有需要，我哋已準備好做嘢(增兵)，亦有能力咁做，但1月轉會好難控制，但只要有機會出現我哋會去把握。」