舒克斯33分鐘含淚離場　準備同福仔一齊躝

曼聯喺英超0比2不敵紐卡素，前鋒約舒亞舒克斯成為全場表現最差球員，領隊魯賓艾摩廉都頂佢唔順，33分鐘就換走呢位23歲荷蘭國腳，佢離場時遭全場球迷噓爆，眼濕濕直接行入更衣室，睇怕前途唔樂觀，可能喺冬季轉會市場重開後被賣走。

約舒亞舒克斯今場難得擔任正選，但演出一無是處，只有14次觸球及9次傳波，並冇射門，曼聯落後2球之下，魯賓艾摩廉唔等上半場結束，就決定用防守中場明奈入替呢位前鋒，就知佢喺場上形同虛設。

最令舒克斯難堪係觀眾席上嘅曼聯球迷都非常贊同今次換人，紛紛叫好，舒克斯黯然直接行入更衣室，稍後先至重回後備席。

曼聯季前豪花3,650萬鎊(約3.55億港元)向博洛尼亞收購約舒亞舒克，但佢上陣26場僅入4球及2次助攻，早前已傳會方準備喺冬季轉會市場出售或者外借佢，據悉祖雲達斯有意接貨。

另1場前鋒拉舒福特被雪藏4場後，雖然今仗重返大軍名單，但並冇份上陣，呢位27歲英格蘭國腳好大機會同約舒亞舒克斯一齊離隊。