奧尼屈堅斯生日入波都冇用　維拉又失分

周二(31日)凌晨英超，阿士東維拉主場出擊，雖然「壽星公」奧尼屈堅斯射入1球12碼，但比賽末段被白禮頓逼和2比2，連續2場聯賽失分，要爭入前4位，形勢唔樂觀。

阿士東維拉上仗吞紐卡素3蛋，兼有射手祖漢杜蘭被逐，今場需要停賽，開賽12分鐘再受打擊，被白禮頓中場西蒙艾丁拿射入大門。維拉失守後傾力反擊，戰至36分鐘獲得12碼，奧尼屈堅斯主射入網，成為呢位比賽當日29歲生日嘅前鋒最佳生日禮物。

換邊後冇耐，摩根羅渣士勁射入網，協助阿士東維拉反超前2比1，但始終保唔住勝果，踢到81分鐘，白禮頓前鋒祖奧柏度橫傳，由後衞蘭普堤射入扳平2比2，祖奧柏度今仗貢獻2次助攻，成為球隊搶番1分嘅功臣。

身為上季前4位球隊嘅阿士東維拉今季成績倒退，現時排第9位，落後第4位車路士6分，想奪取下屆歐聯入場券，愈來愈困難，領隊艾美利承認競爭非常激烈，但仲有半季要踢，有信心後來居上。

至於白禮頓成為「和波專家」近7場聯賽取得5和2負，落後維拉2分，排第10位。