祖記隊長被踢出意超盃名單　或轉投拿玻里

祖雲達斯將飛去沙特阿拉伯，出戰今屆意超盃，根據意大利傳媒爆料，隊長丹尼路雷斯冇份入選大軍名單，準備等冬季轉會市場重開後，加盟另一支意甲勁旅拿玻里。

現年33歲嘅丹尼路雷斯2019年由曼城加盟祖雲達斯，過去4季都係主力，但新帥莫達今季領軍後，提拔2位「00後」新星安達亞甘比亞素、尼高路沙禾拿擔任左右二閘，令丹尼路雷斯上陣時間減少，早前已傳出佢有意離隊。丹尼路雷斯近3場比賽都冇上陣，加上今次無緣意超盃球員名單，似乎離隊已成定局。

根據「轉會權威」記者羅曼諾(Fabrizio Romano)爆料，祖雲達斯同丹尼路雷斯達成協議，批准佢提早嚟緊1月自由身離隊，拿玻里等多支球隊有意簽佢。祖雲達斯將於嚟緊1月4日凌晨意超盃4強對AC米蘭，另1場4強由國際米蘭對阿特蘭大。