巴甲大搞作　力邀普巴拉莫斯助陣

巴甲以往都係向歐洲大球會輸出高質素球員，近年積極拉攏歐洲兵來投，現時兩位自由身球星保羅普巴、沙治奧拉莫斯成為巴甲球會爭相搶奪目標，高士路計劃簽入拉莫斯，哥連泰斯對普巴有興趣。

現年38歲嘅沙治奧拉莫斯上季結束後離開西維爾，但並冇打算退休，即使未有球會落班，都保持操練。根據意大利媒體《慢鏡頭》爆料，高士路更換會長後，財政有改善，並希望簽入呢位前西班牙國腳，提升號召力，增加票房收入，行政總裁馬度斯拿透露，準備向拉莫斯開出合約，但唔知對方肯唔肯去南美洲踢波。

另外，保羅普巴因為服食禁藥事件被罰停賽，繼而遭祖雲達斯解約，呢位31歲法國中場將於嚟緊3月刑滿，歐洲球會對佢敬而遠之，哥連泰斯希望趁機邀請普巴來投。哥連泰斯上季簽入荷蘭前鋒迪比，如果普巴願意加盟，2位前曼聯球星就可以合作。