巴塞必須午夜前出售包廂　否則奧莫離隊

巴塞隆拿同丹尼爾奧莫嘅註冊期限得番幾個鐘頭，如果未能完成註冊，奧莫可以單方面解約，自由身轉投任何一隊，據報巴塞打算出售未來新魯營球場嘅VIP包廂，籌集資金完成註冊。

奧莫季初以5,500萬歐元由RB萊比錫加盟巴塞，不過因為球會爛帳太多搞到註唔到冊，只能以傷病球員安達斯基斯坦臣嘅名額註冊，但奧莫嘅註冊時效到1月1日到期，巴塞又要再諗其他方法。

最新方案係巴塞提前出售魯營球場VIP包廂，據報已經喺中東搵到富豪買家，如果成功出售巴塞可以獲得1億歐元收入，可以同奧莫及另一球員保羅域陀註冊，不過巴塞必須在限期前提供合約副本同訂金證明，限期就係西班牙當地時間12月31日午夜11點59分。

另一個方法係巴塞董事做個人擔保，金額係1,000萬歐元，似乎呢個方法最快同最有效，2022年佢哋亦係用呢個方法同祖利斯古迪註冊。