拉舒福特轉經理人公司　決心1月離開曼聯

曼聯前鋒拉舒福特上場聯賽被「解凍」，重新返回大軍名單，不過仍然未有上陣機會，據英國傳媒報道，拉舒福特準備簽約「龍頭」經理人公司，希望可以喺冬季轉會窗實現離隊願望，去意堅決。

英國《太陽報》報道，拉舒福特加速轉會計劃，原本佢係由哥哥Dwaine Maynard出任經理人，不過最近同龐大經理人公司Stellar密斟加盟，呢間被視為「龍頭」嘅經理人公司4年前畀美國娛樂公司收購，連荷里活影星都搵佢哋做經紀，Stellar嘅「代表作」就係喺2013年，成功策劃加里夫巴利以9,000萬鎊天價由熱刺過檔皇家馬德里。

27歲嘅拉舒福特自上月中歐霸盃後被打入冷宮，曾連續4場被踢出大軍名單，佢亦喺訪問中作出離隊宣言，表明已經準備好迎戰足球新一頁。法甲豪門巴黎聖日耳門1年前曾提出收購拉舒福特被拒，而阿仙奴同沙特球會亦傳出對「福仔」有興趣。